ديريكت -سيدي رحال الشاطئ
الرئيس ديال جماعة سيدي رحال الشاطئ الشاطئ باغي يترامى على ملك الغير و يكري عقارات ماشي ديالو بإسم الجماعة و يدخلها في الملك العمومي .
جماعة سيدي رحال الشاطئ اللي المقر ديالها ما قدراتش تسوي الوضعية القانونية ديالو و تخلص ليه المعاوضة، ناضت جمعات بزاف العقارات اللي ماشي ديالها و بغات تدخلهم في الملك الجماعي ديالها و تكريهم .
لكن دخلو في صدام مع القانون الجديد رقم 57.19 و اللي تاي يفرض تعيين لجنة ديال الخبرة و التقويم و اللي تاي يفرض على الجماعة تعطي المراجع ديال كل عقار و لاش باغا تخصصو و البلان ديالو .
هاذ اللجنة استدعاها العامل و دارت ثلات إجتماعات في باشوية سيدي رحال و ما بغاتش تحدد أي ثمن لأي عقار ماشي في ملك الجماعة هاذشي اللي خلا نائب الرئيس لي تاي ياكل من الكميلة ديال الصيف يشكك في أعضاء اللجنة و يتهمهم بالباطل بعرقلة دورات المجلس لي هوما ما تاي حضرو ليها و مكاي صوتوش فيها، لا لشيئ سوى لانهم ما بغاوش يخرقو القانون و يساهمو في الاستيلاء على عقارات الغير .
هذ الإشكالية فرضات على العامل يعاود يستدعي اللجنة باش تعقد إجتماع في مقر العمالة و الكاتب العام هو لي ترأس الاجتماع و رئيس الجماعة أكد للجنة انه قادر يتحمل المسؤولية باش الجماعة تكري عقارات ماشي ديالها و انهم غي يحضرو و يسجلو الرفض ديالهم و أن العامل في جنبو من أجل خرق القانون.
لكن المحضر لي تنجز مافيهش شي خبرة و ما فيهش أسماء ديال اعضاء اللجنة لي حضرو و لا حتى شكون ترأس الإجتماع بل أكد لينا مصدر مطلع من عمالة برشيد أن الكاتب العام طلب من المكلف بتحرير المحضر انه يحيد إسمو و ما يذكروش في محضر الاجتماع ، و لكون هاالإجتماع عرفو تطرق لاشياء مخالفة للقانون و خاف على راسو . لكن أعضاء اللجة رفضات تبت في أي خبرة و سجلات التحفظ ديالهاعلى العقارات لي ماشي ديال الجماعة.
حتال هنا تاي يبان كلشي غير قانوني و بتاريخ 5 ابريل الرئيس تحدى القانون من جديد و بناءا على محضر الخبرة اللي ما عندو لا ساس لا راس و لي يقراه يعرف انه منجز مسبقا على المقاس و اه اللجنة سجلات فيه الرفض ، قرر يعقد دورة استثنائية باش يدير دفاتر تحملات لكل عقار باش يكريه و الغريب ان تم المصادقة على هاذ النقط دون موافاة الاعضاء لي صوتو بالموافقة لا على محضر الخبرة و لا حتى على دفاتر التحملات .
سؤال ماشي بريئ كيفاش عضو يصوت لشي حاجة ما عارفهاش . هاذ الدورة الاستثنائية اللي بتات في نقط غير قانونية خلات السلطة المحلية تخاف و ما تحضرش ليها و تكتفي ببعت موظف ينوب عن الباشا في حين كاين جوج قياد و باشا ، و لي حضر موظف ما عندو حتى صفة قانونية لي تخليه يحضر و يترأس بجانب الرئيس و مدير مصالح الجماعة الدورة .
هذا إمتحان لسلطة الوصاية ببرشيد و قدرتها على الحفاظ على ضمان احترام القانون و عدم الزج بجماعة سيدي رحال و عمالة إقليم برشيد في قضايا جنحية تتعلق بالترامي على ملك الغير.
