ديريكت : سيدي رحال الشاطئ
في واحد المشهد اللي صراحة تايضحك و تا يبكي في نفس الوقت، أعضاء جماعة سيدي رحال الشاطئ نساو اليوم يديرو تحية العلم بمناسبة ذكرى المسيرة الخضراء. هاذ المناسبة العزيزة على الشعب المغربي دازت بحال أي نهار عادي في الجماعة، بلا تحية علم بلا احتفالات ولا أنشطة تليق بهاذ الذكرى العزيزة و الغالية .
سولنا واحد من الاعضاء في نفس الجماعة و، قال لينا الدراري تايكونو ناشطين بالليل وتا يصعب عليهم يفيقو بكري و يجيو يوقفو في الشمس بالصباح . بحال لا ذكرى المسيرة الخضراء هي شي موعد خفيف و تحية العلم الوطني نقدر نسهاو عليها و ماشي من مقدسات الوطن.
واش هاذ النسيان تايجي من السهر ديال الليل في لي بلاج بريفي ديال طماريس ولا من تهاون السلطة المحلية و الإقليمية في تكريس احترام مقدسات الوطن ؟ ماعرفناش. المهم اللي باين هو أن هاذ النسيان خلا الناس في سيدي رحال الشاطئ حايرين واش يضحكو على الدراري ديال المجلس البلدي اللي “عا نساو” ولا يبكيو على الحالة ديال الجماعة اللي حتى الذكرى الوطنية الغالية نساوها و خلاوها تفوت بدون أي نشاط و كانها لا شيء و إكتفاو بالاستماع للخطاب السامي لصاحب الجلالة هاذ العشية كأن هاذ الجماعة غير معنية بتكريس الشعور بحس بالمواطنة و الدفاع عن مكتسبات الوطن .