ديريكت : سيدي رحال الشاطئ .
كل نهار فضيحة في جماعة سيدي رحال الشاطئ. الجماعة ولات من أشهر الجماعات فالمغرب، ماشي حيت زوينة ولا عندها سمعة مزيانة، ولكن حيت كل نهار طالعة شي فضيحة جديدة. آخر هاد الفضايح هي الشكاية اللي تقدمات بها ثلاث موظفات من مركز الكرامة لذوي الاحتياجات الخاصة ضد عضو فالمجلس الجماعي، اللي تيلعب دور كاتب المجلس، ومعاه حتى سيدة أخرى حتى هي مشتكى بها.
الشكاية اللي معروضة دابا قدام وكيل الملك فبرشيد، تحت رقم 1887/3101/2023 و لي حصلات الجريدة على نسخة منها، فضحات تلاعبات العضو اللي تابع لحزب الاستقلال. المشتكيات قالو باللي هاد السيد هو الممثل القانوني للمركز وتايستغل منصبو فالجماعة باش يضغط عليهم ويجبرهم يوقعو على إشهادات فمكتب تصحيح الإمضاءات فالجماعة اللي هو عضو فيها بأنهم تخلصو ، ومن بعد تاي يدي ليهم نص الشهرية ديالهم حسي مسي.
الفضيحة الكبيرة هي أن هاد العضو الا فعلا تات تربطو شي علاقة بهاذ الجمعية ، فراه خاصو العزل من شحال هذا ولا عامل برشيد ما خباروش حتى هذي حيث الجمعية تاخد الدعم من الجماعة اللي هو عضو فيها.
كان مديكلاري الموظفات بمبلغ 3500 درهم تات تجيهم من المبادرة و التعاون الوطني ، ولكن داير يدو تما، تيهزهم باش يصرفو الشيكات من البنك ، ويوقعو ليه على إشهادات فالجماعة أنهوم توصلو بالأجرة ديالهم، ومن بعد تايخذ ليهم نص الخلصة.
آخر محاولة ديالو باش يستفد فشلات ملي حاول يسحب 17500 درهم يوم 07/06/2024 مقابل خدمة ديال خمسة شهور. ولكن وحدة من الموظفات لي كانت هذي خلصتها فاقت باللعبة، ورفضات تعطيهم الفلوس بعدما خرجو من البنك، وحاول العضو والسيدة اللي كانت معاه يركبوها بزز فالطوموبيل وتعداو عليها باش ياخذو منها الفلوس ديالها و لي أكداتو بشهاذة طبية و تسجيلات لي عندنا نسخة منها .
دابا الملف فمحكمة برشيد، بعدما تم الاستماع لجميع الاطراف فاللابيجي ديال برشيد ، وتحط محضر رقم 766 بتاريخ 02/07/2024، والملف الآن في الدراسة .
المشتكيات تايستنّاو القضاء فبرشيد ياخذ ليهم حقهم. الفضيحة مازال تاي تقاقي وتزيد فالبيض، وكاين اللي تايقول أن هادي غير البداية فهاد الملف الثقيل.