1500 درهم عطاها النائب اللول ديال الريس باش يطيح “الفيدور” ف جريمة إفساد العملية الانتخابية بالمال
ديريكت برشيد//
فرشات تصريحات المتهمين امام القاضي الجالس بالقاعة رقم 2 بمحكمة برشيد ، مرشح الدائرة 4 بجماعة سيدي رحال الشاطئ التابعة لعمالة برشيد لي ولى النائب الاول للريس هو و الرفيقة ديالو ، وكشف الاستماع إلى امرأة وراجلها، أن الفيديو مفبرك، والسيناريو ديالو خطط ليه المرشح الاستقلالي، وعطاهم الفلوس باش يصيدو ليه الخصم، لي فات كان رئيس جماعة، حيت خايف لا يخلق المشاكيل ويعرقل أطماع الدركي السابق في تحكمه في الجماعة.
تفاصيل القضية من بعد البحث في الشريط و بعد اتمام التحقيق ، تبين أن مرا و راجلها اتفقوا مع مرشح الميزان، باش يمشيو عند السيد الملقب ب”الفيدور”، واختارهم واخا هما ماشي فالدائرة ديالو ، حيت ولدهم سبق ليه كان خدام عندو ومهلي فيه، وعرف بلي الكمين غادي ينجح. الاستقلالي عطاهم بورطابل ورسم السناريو على أساس طلب مساعدة، وفعلا مشاو عندو وطلبوه على ولدهم وعلى الظروف الصعيبة ديالهم، وعطاهم شي بركة، وقالت ليه المرأة عبارة باش تطيحو، لكن هو رفض، حيت قالت ليه غادي نجيب ليك خمسة الأصوات، قال ليها هو لا هاد البركة عطيتها ليك بلا انتخالبات وبلا تصويت.
والاستقلالي كان واعد المرأة وراجلها بلي غادي يبني ليهم صندوق عشوائي و مغاديش يخرج الفيديو داكشي علاش داو ليه التليفون، وهو في الحملة، وخداه منهم وصيفطهم عند الكاتبة (الرفيقة) وعطاتهم 1500 درهم، مقابل هاد السيناريو.
من بعد بان الفيديو ف يصفحة فيسبوكية متخصصة في السب والقذف واستهداف المرشحين لي جميع المتتبعين للشان المحلي تاي ياكدو انها تابعة لي النائب الاستقلالي نفسوا، وملي شافو راجل المرا غوت “وناري دارها بيا”، وذكر اسم الاستقلالي، على حساب تصريحات المرا عند الدرك الملكي .
المشكوك فيه الاستقلالي واعدهم باش مغاديش يخرج الفيديو وغايحتافظ بيه لغرض آخر، لكن خرج الفيديو وشوه المرا اللي بانت فيه، على حساب تصريحات راجلها حتى هو عند الدرك.
المهم المرا وراجلها و الشاهد اليوم فرشوا كلشي أمام القاضي واخا الدركي السابق و الرفيقة ديالو لي نكرات الصلة ديالها بيه واخا تصاورهم حدا بعضياتهم كايينين في صفحة جماعة سيدي رحال في كل نشاط و حتى هو نكر لكن لمرا و راجلها و الشاهد واجهوهم و أكدو كلامهم لي صرحو بيه في جميع مراحل القضية.
الملف كان خاص يتعاد التكييف ديالو ويتاخذ قرار الاعتقال حيت المشكوك فيه خطير و هذا يعتبر تشكيل عصابة اجرامية، راه فبرك قصة هو و الرفيقة ديالو و لمرا و راجلها باش يطيح “الفيدور” ويشوه الصمعة ديالو و لا يصيفطو للحبس شيئ خطير .
بعض الناس خايفين من التدخلات حيت المتهم كان جدارمي سابق وعندوالقوالب ديال الإنكار، ودايرين بيه أصحاب نفوذ في الحزب لي كي ينتمي ليه و اللي كيسكن ببرشيد.
دابا السؤال هو واش محكمة برشيد غادي تعطي درس للمتلاعبين بالعملية الانتخابية و لهاذ العصابة باش ما تتعاودش مرة خرى؟.